11 نقطه مهمة تجعلك تكتب محتوى حصرى وقوى ، تعالوا نتكلم النهارده عن حاجه من اهم الحاجات فى الـ Digital Marketing وهى الـ Content او المحتوى
كلنا عارفين الجمله الشهيره جدا Content is King ( المحتوى هو الملك )
والنهارده هقولكوا ببساطه ازاى تحاولوا تعملوا محتوى قوى والمحتوى القوى مش بس كنصوص مكتوبه لا المحتوى الحصرى بيكون فى الصور وفى الفيديوهات.
كيف تكتب محتوى قوى وحصرى ؟
المحتوى يجب أن يكون حصرى
حصرى دى مش لازم يكون الموضوع اللى بتعمل عنه محتوى انت بس اللى شغال فيه .. ممكن تكون بتعمل محتوى فى مجال ناس كتير جدا بتنزل فيه محتوى بس تناولك للموضوع بشكل وبافكار مختلفه تماما فمن هنا هيكون حصرى - زى مثلا مواقع الاخبار - كلها بتتكلم عن احداث معينه لكن المفروض كل موقع او صفحه تكون صياغتها لنفس الخبر مختلفه.تكون بتقدم Inbound Marketing و value
لازم تراعى النقطتين دول فى المحتوى بتاعك للجمهور اللى مستهدفه لان دول من اهم عناصر جذب الجمهور انه يلاقى فى اهتمام بالمحتوى اللى بيتقدمله وفيه اضافه بيقدر يحصل عليها وبعد كده هتلاقيه دايما بيتابعك باستمرار.المحتوى المتجدد
انه الجمهور اللى بيتابعك يلاقى دايما محتواك متجدد وفيه افكار جديده ومواضيع مهمه .. هتخلى جمهورك دايما متابعك ومخليك من اولوياته فى المواقع والصفحات اللى بيتابعها.المحتوى لازم يكون منوع
مينفعش تعتمد على النصوص بس .. لازم تنوع مابين نصوص وصور وفيديوهات وGIF لان الجمهور بيكون متقسم لشرائح منهم اللى بيحب النصوص ومنهم اللى بيحب الفيديوهات ومنهم اللى بتجذبه الصور بس .. فعشان تقدر توصل لاكبر عدد من الجمهور لازم تراعى انك توصله بكل انواع المحتوى.المحتوى لازم يكون متنوع
يعنى ميكونش المحتوى عن المنتج او الخدمه اللى بتبعهم وبس .. لازم يكون فيه محتوى كمعلومات عامه ومحتوى يكون للمتخصصيين بس فى المجال اللى بتسوقله - يعنى لو حد زيى دخل على صفحه طبيه مثلا وشاف المحتوى اللى معمول للدكاتره بس ومفهمتوش مفيش مشكله - ومحتوى اجتماعى زى الكوميكسات والمسابقات ( وتحاول تربط المحتوى الاجتماعى بالمجال ) ومحتوى المناسبات اللى ممكن تستغلها عشان تقدم فيها عروض كويسه تحقق نسب مبيعات عاليه.استخدام الـ Keywords ( الكلمات البحثيه )
وده طبعا من اهم واقوى عناصر نجاح الـ SEO لاى موقع الكترونى لكن كمان مهم جدا جدا فى محتوى الـ Social media لانك لازم تبقى عارف الناس بتدور عليك بايه حتى على السوشيال ميديا وتضيف الـ Keywords المستهدفه فى المحتوى هيساعد بان اكونتات السوشيال ميديا بتاعك تظهر فى نتائج البحث سواء فى جوجل ( زى صفحات الفيس ومنشورات الفيس واكونتات تويتر وفيديوهات اليوتيوب ) او لما يعملوا سيرش جوه مواقع السوشيال ميديا المختلفه.اوعوا تغلطوا الغلطه البشعه دى
الغلطه دى اللى هى بيبقى نفس المحتوى موجود على كل مواقع السوشيال ميديا .. لان كل موقع ليه طبيعته وطبيعة جمهوره فلازم بالتابعيه يكون ليه المحتوى الخاص بيه حتى لو بتتكلم عن نفس الموضوع .. اوعوا تغلطوا الغلطه دى الله يكرمكوا.تحليل المحتوى دائما
سواء المحتوى الخاص بيك او بمنافسينك .. وده هيخليك تبقى عارف مستوى المحتوى بتاعك عامل ازاى - طبعا تفاعل الجمهور واهتمامهم بتكون مؤشرات مهمه - لكن تحليل المحتوى مهم جدا جدا جدا.المحتوى المطرقع
المحتوى المطرقع على السوشيال ميديا هو اللى دايما بيسمع مع الناس وبينتشر بسرعه جدا جدا.التخصص
بصوا يا جماعه الاصل فى الموضوع ان يكون فى حد متخصص لـ ( صناعة المحتوى ) وده بيكون بيكون دارس وفاهم يعنى ايه محتوى .. وبيكون من ضمن الـ Digital Marketing Team .. لكن عندنا فى مصر والوطن العربى عامة اللى بيروح يشتغل بيكون بتاع كله للاسف .. فاللى يقدر يتعاون مع حد شغلته بس صناعة محتوى هيقدر ياخد منه محتوى متطور ومختلف تماما تماما عن اى محتوى ممكن اى حد غير متخصص يكتبه.استراتيجيه المحتوى
لازم يكون المحتوى ليه استراتيجيه واضحه وعارف هتنزل المحتوى امتى وازاى وتكون محدد الـ Plan بتاعت المحتوى بكل عناصرها وليكن كل اسبوع فى اوله عشان كمان اذا فى ناس تانيه شغاله معاك - زى الديزاينر ومتخصص المحتوى - يكونوا عارفين ايه اللى مطلوب منهم على مدار الاسبوع.فى النهايه موضوع المحتوى كبير جدا جدا ومينفعش يتشرح فى موضوع ولا اتنين وركزوا دايما فى ان يكون معاكم حد فاهم فى المحتوى
اتمنى اكون قدمتلكوا حاجه بسيطه ومفيده فى نفس الوقت وإن شاء الله هيكون فى مواضيع اخرى عن المحتوى.
ولو فى اى ملاحظات او معلومات مفيده برضه تعالوا نتناقش فيها مع بعض فى التعليقات.
الإبتساماتإخفاء